بتكابر ليه ؟ شعر غادة مبارك
بتكابر ليه؟
مش شايف نفسك رايح فين
مش واخد بالك من الأحداث
طب ركز كده في عيون الناس
طب عينك انت مش بترف
جواك حكايات أحلام وطموح
وحاجات تاهت وحاجات ماتت
جواك انسان مركون على الرف
عشمان كده ليه؟
بتمني دماغك بالأوهام
وتحط خطط لسنين قدام
تسهر أيام وعينيك ما تنام
بتفكر وبتعصر روحك
تنزف وتلملم في جروحك
قال يعني الدنيا هتبقى تمام
ده تاريخ بيعيد نفسه قصادك
وشريط بيسف
خايف من ايه؟
من ماضي عدى بقى امبارح
من بكرة اللي ما لهش ملامح
من حاضر لا أنت عارف تجاريه
ولا حاسس إنك عايش فيه
أصل المهزوم من وطنه قتيل
كلمات الدنيا ازاي تواسيه
وان عاش متغرب في بلاده
يتغمي عشان في الساقية يلف
ده القلم إن نام عن كلمة حق
ما قدرش يقول للظالم لأ
يستاهل حبره يضيع ويجف
والشخص اللي يسلم لهوان
ميت في الجلد من الطغيان
ويقوم ابنه وينام جعان
راح يجي اليوم على وشه يتف .