اتعودت اسند علي نفسي – شعر – غادة مبارك

‏ اتعودت اسند علي نفسي انا بحايلني وانا بداديني
واما الازمة تشد أخبي وكمي بيمسح دمعة عيني

ولما الدنيا تضيق وتقفل أجري واصلي وادعي يارب اهديني وراضيني 
هشكي لمين وبأيه ينفعني ممكن افضفض باللي واجعني 
واسمع ايه اصبري معلشي طب ما انا بعرف امعلش نفسي
عقلي يقول هي الناس ناقصة دي الاحزان واخدانا مناقصة
دنيا بتهبد فينا بذمة مش عاتقانا في قاع ولا قمة
مين باله رايق او مرتاح ده حتي في عز الفرح جراح
اللي معاه ولا المعهوش دنيا بتحفر فينا رتوش
ناس عايشينها بخير وطيابة وناس عاملين في الغابة وحوش
طمن قلبك منك ليه انت فاكرها حلق حوش
ده المكتوب لك فوق تلاقيه مش بالعافية وريش منفوش
فوق واعقلها كده واتوكل قبل مايجي اليوم تتوكل
حاسب نفسك اول باول عمر معدي قصر او طول
قبل ماتيجي اللحظة الحاسمة ومايفيد فيها طرح وقسمة
وتعرف انك كده علي بعضك بابتساماتك وانتكاساتك وادق التفاصيل في حياتك ..ولا ليك لازمة
متر في متر منابك فيها مش مستاهلة تبكي عليها والجري تلاقيه علي فاشوش
مين هيخلد فيها دي زايلة طلعت او نزلت فنكووووش..