صباح الفل علي بكرة
اللي جاي فارد دراعاته
بيحضنا ويتبسم رغم أنف الكل ..
صباح الفل ع الناس
اللي طلة واحدة في عيونها
تنسينا اللي راح كله
تبدل سكة الأحزان بورد وفل ..
صباح جاي بعد ليل عتمة
وشتا بارد يقول للحلم قوم إصحي
بحبة صبر وإرادة
نقول للمستحيل ممكن
وجايز كل شيء وارد…
صباح عارف طريقه منين
وهدفه أسمي من لقمة
ومن نومة ومن هدمة
صباح راسم حياة أحلى
لناس حتى مايعرفهمش
شايفهم يستحقوا النور
صباح جاي ومتربي
على مبادئ ومش أوهام
لا يعرف كيد ولا مزايدة
ولا تطبيل وكذب وزور ..
صباح جاي يتسند على كتاف فاهمة
بتحاول بتبذل كل ما تملك
عشان الخير يطول الكل
بترضى بالقليل ممكن
ولكن عمرها ما ترضى بكسر وذل . . .
صباح الخير على بلادي
علي صعيدنا وع الدلتا وعلى الوادي
اللي أنا منه ومن اهله
صباح يبني وبيعلي
بُنا بالعقل مش بالطوب
يلم الكل في الصورة
عشان قادرين نميز صح
بين الحر والمعطوب ..
صباح مصري أصيل جدا
من اللي مصر تستاهله
صباح يوعدنا بالأجمل
وبالأكمل مسيره يهل
ويقرب علينا يطل
صباح الفل يا بلادي
صباح الفل علي بكرة
اللي جاي جاي رغم أنف الكل
